ياللا نبدأ من جديد واللى اللى فات مات

بقلم: دكتورة سمر ابراهيم

هل ساعات تنتابك مشاعر، بتكون نفسك تتخلص منها بس مش عارف ازاى ؟ طيب ساعات بتحس انك نفسك تنجح بس الفشل مسيطر عليك ؟
طيب نفسك تغير من حياتك وتنسى فشلك وتبدأ من جديد ؟؟
نفسك تقول اللى فات مات مش هفكر غير فى حياتى اللي جاية ؟؟؟
تعالى نشوف كده ازاى نبدأ من جديد و يا ترى ممكن!!

متهيألى اننا ممكن نقابل فى حياتنا مواقف سلبية وتحديات كتير وصعوبات من الممكن انه يصعب تحقيقها وان في مشاكل مستحيل تنتهى -ودا طبعا ف مفهومنا احنا بس لانها جزء من الحياة ..

طيب ايه رأيكم احكيلكم عن تجربتى الشخصية فى حياتى يعنى واحدة من تجاربى الشخصية مش كلها لانى لو حكيت عن تجاربى الشخصية مش هيكفيها مجلد كامل ..

المهم اول حاجة فكرت فيها هى انى اتعلم اواجه مشاكلى لما تحصل وانى اتعامل مع الحياة كده بالدراع زى مبيقولوا ..ايه يعنى اللى هيكون لذيذ في الحياة من غير تحدى ،لو كان امبارح زى النهاردة زى بكرة فين بقا الجمال في الحياة اللى بالشكل دة..

فقررت اغير من نفسى ومن طريقة تفكيرى وانى انفتح عالدنيا اكتر واتعلم اكتر واستفيد اكتر ..
يعنى كان لازم ارمى امبارح واقول عليه اللى فات مات ويلا ابدأى من جديد ..

وبالفعل بدأت على الرغم من ان اللى مريت بيه لو كان جبل كان انهار لكنى رجعت وقفت على رجلى من تانى واعتقد ان اقرب ناس ليّ لما هيقروا الكلام دة هيصدقونى القول ..

المهم قررت انى ادرس حاجة كنت بحبها وهى الكتابة من صغرى فقررت انى ادرس اعلام وخلال الاربع سنوات للدراسة اتعلمت كتير من دكاتره عظماء بالفعل والحمد لله هم اصدقائى ومازالوا حتى اللحظة وكبار الكتاب والصحفيين..

واكملت الدراسة بحصولى على 3 دبلومات وتعادلوا بالماجستير والان فى استعداد لمناقشة الدكتوراه ، هذا غير دورات تطوير الذات منها المصرى والاجنبى واعتمادى مدرب دولى واستشارى وحصولى على الرخصة الدولية للتدريب من الولايات المتحدة الامريكية ،

هذا مع اكتسابي اصدقاء جدد فى حياتى وايضا اصدقاء خذلونى ومضوا فى طريقهم واصدقاء فارقوا الحياة ربنا يرحمهم ولكن الحياة تسير بخطى واسعة لى وكل هذا بفضل الله واخلاص النية فى انى اغير واطور من حياتى لانى المسئولة الاولى عن اى حاجة وصلت لها سواء ايجابية او سلبية نظرا لمفاجآت الحياة ومواقفها فانت اللى بتحدد عايز تخليها مواقف سعيدة ولا مواقف تعيسة ..

وانا بفضل الله كل المواقف السلبية ف حياتى مخلتهاش تنقص من ذاتى بالعكس اللى وصلتله من نجاحات جعلنى فخورة بنفسى وثقتى زادت فى نفسى جدا واستطيع تحمل اى صعاب تواجهنى مرة اخرى لانى اصبحت انضج واعمق ..

عشان كده انا بقول فكر نفسك دايما انك انت جيت الدنيا عشان رسالة،
لان وجودك مش من فراغ ربنا له حكمة في ان يبقي لك دور فى كل حاجة حواليك ….
دور وشوف انت ممكن تعمل ايه وتتقن فيه على اكمل وجه……
مش مهم تفشل مرة او مرتين او حتى مراات …..المهم انك تتعلم وتنحج بعد كده لان عمرك ماهتحس بطعم النجاح الا لما تدوق مرارة الفشل ….

#_صدقونى
مثل اللى فات مات ده من أحسن الأمثال للسنة الجديدة بمعنى أنى أطلع من الماضى أتعلم منه… ولكن من غير ما تعيش فيه لأن ده هيأثر عليك ويجرك الفشل اللى مسيطر عليك ..

أتعلم ازاى تتكلم وتتناقش فى جو هادى مع الأخرين وتوصل فكرتك وتكون شخص مرن….
أنت مش عارف كل حاجة فى الدنيا.. . …ولازم تسمع وتتعلم وتستفاد من الأخرين بشكل كبير…

أختار الناس المحفزين فى الحياة أنهم يكونوا أصحابك وابعد تماما على أصحاب نظرية المؤامرة اللى مؤمن تماما ان الكون كله بيتأمر عليه وخلى بالك ان الفشل بالعدوى والنجاح كمان بالعدوى…. يعنى أختار الناس الايجابين والناجحين ده بدوره هيساعك أنك تكون أحسن…

أى انسان عنده نقاط ضعف وقوة.. اعرف نقاط قوتك وطورها ونقاط ضعفك وحسن منها واعترف بعيوبك …على فكرة مش عيب…بس العيب انك تكابر وتشوف العيوب دى مميزات ….

أهلك ليهم دور كبير فى اللى أنت وصلت ليه لازم ترضيهم بشكل كبير وكمان أتعلم منهم واستفيد من خبراتهم و ونصايحهم وأعرف أن عليك دور تجاهم زى مااصحابك انت بتوفيهم حقهم، اهلك اولى من اى حد فى الدنيا ….

أستغل السنة الجديدة سواء بتدرس او بتشتغل ان كل يوم هتطور حاجة جديدة من نفسك ومش هتوقف عندها لكن دايما هتحاول بكل الطرق تتعلم وتكون أحسن….

أفتكر ان الحياة أختيار … يعنى أنت اللى بتختار هتنجح او هتفشل هتعيش مبسوط وسعيد و لا هتستسلم وتسيب الحياة هى اللى تواجهك…..

يالا ارمى الماضى وابدأ من جديد واللى فات مات زى مااتفقنا…

دمتم سعداء ناجحين فى حياتكم اعزاء عند الله ان شاء الله
وفقكم الله للخير فيما يحبه ويرضاه